أسماء بكساوي تكتب “جريمة غسيل الأموال”

كتبت: أسماء بكساوي

مش لازم تكون تاجر مخدرات علشان تتحاسب عليها!

في ناس بتفتكر إن غسيل الأموال جريمة بتخص “الكبار” بس.. الحقيقة؟ أي حد ممكن يدخل فيها لو استخدم حسابه، أو اسمه، أو شركته بشكل غلط!

يعني إيه غسيل أموال؟

هي محاولة “تنظيف” أموال جاية من مصدر غير مشروع (زي تجارة سلاح، مخدرات، رشاوي، تهرب ضريبي، تجارة عملة، آثار…)

عن طريق إخفاء مصدرها وتحريكها في أنشطة ظاهرها قانوني (شراء عقارات – فتح شركات – تحويلات بنكية – تجارة سيارات – مشاريع وهمية).

⚖️القانون بيقول إيه؟

📜 القانون رقم 80 لسنة 2002 بشأن مكافحة غسيل الأموال – والمعدل بالقانون 36 لسنة 2014 – بينص إن:

“كل من تعمد تحويل أو نقل أموال أو استبدالها بهدف إخفاء مصدرها غير المشروع يُعاقب بالسجن من 3 لـ 7 سنين، وغرامة تُعادل قيمة الأموال محل الجريمة.”

أمثلة بتدخل صاحبها السجن:

واحد حول مبلغ كبير لصاحبه في الخارج بدون سبب واضح أو نشاط تجاري معروف

ست باسمها شركة وبتستلم تحويلات بملايين وهي لا تملك نشاط حقيقي

موظف وافق يدخل اسمه كـ “شريك صوري” في شركة مايعرفش أصل مالها

شخص باع عقار أو عربية لحد بـ”سعر مضروب” علشان يضرب ورق رسمي ويغطّي على مصدر الاموال

 العقوبة:

سجن من 3 لـ 7 سنوات

غرامة مالية ضخمة (مش أقل من قيمة االاموال المتحفظ عليها)

مصادرة الاموال والممتلكات

إدراج المتهم على قائمة الإرهاب في بعض الحالات!

تحذير قانوني واضح:

متبقاش وسيلة لحد يستخدم اسمك أو حسابك في تحويلات مش مفهومة

متفتحش شركات وهمية أو حسابات بنكية باسمك

راجع أي نشاط بيتم باسمك.. لأنك ممكن تبقى متهم وأنت مش واخد بالك!

نصيحة محامي:

لو عندك تحويلات مالية كبيرة أو تعاملات غير اعتيادية، لازم يكون عندك مستند يثبت مصدر الفلوس.. لأن الجهل بالقانون مش هيعفيك من المسؤولية.