“قطار العمر” لهناء هيكل

بقلم _ هناء هيكل

كل ما العمر يعدي  قطار العمر

كل ما قدرتنا على تحمل الصدمات بتختلف

في ناس بتتجمد او جتتها  بتنحس و تبقى زي الحجر في وش الصدمة

و ناس تانية قوتها بتنهار من كتر اللي شافوه  و من اقل صدمة مهما كانت تافهة اعصابهم بتبوظ و بينهاروا فعليا .

و دايما دايما  اصعب شيء في الصدمة على الكل

اللحظة الأولى

اللحظة اللي بتسمع فيها الخبر  اللي عينك بتشوف فيها الحدث

لحظة قلبك بيتعصر فيها عصر و تحس الدم انسحب من مخك و من كل خلاياك و اتصفى على الارض

لا قادر تفكر و لا قادر ترد و لا حتى قادر تعبر عن اللي جواك بصرخة او حتى دموع

لحظة مميتة

المشكلة انه مهما كنت من أي نوع من الناس في تقبل الصدمات

توازنك بيختل حبة حلويين بعد اللحظة دي

حالة من التشتت الذهني و النفسي و الجسدي مرعبة

بس الشاطر  اللي يعرف يلم نفسه  ويرجع يقف على رجليه

بس اللي  يعرف بس للاسف كتير من الناس بتحس ان

طاقتها بقيت صفر وبتبقي محتاجة اللي يقويها اللي يسندها اللي يحس بيها في وقت الوجع لان مش كل الناس تقدر تتعافي بنفسها أو لوحدها من اي صدمة